Lut dänkt

Warum u wieso ig lut wott afo dänke...

 

I weiss nid wies dir geit, aber i mim Chopf plapperets pouselos u ohni Punkt u ou ohni Koma.

Mänggisch ligt de das Gringli sogar no z'Nacht wach u plouderet munter vorsech häre.

Mänggisch verzeuts ganz intressanti Sache u mänggisch hirnets is Lääre use.

Am Obe het's ds letschte Wort und am Morge ds erschte.

Düre Tag si de so mänggi gseiti Wort verlore gange...bises ume het afo inachte. U wieder hets afo ploudere wienes Bärgbächli.

So ha i mi entschlosse, dass ig das, was mir i däm Gringli umedrolet, uf Papier z'bringe.

Öpe eis hani de nöime öpis lut vorgläse, wases mir so dänkt i mim Oberstübli. U das het däm Gringli gfaue.

Mänggisch het öper mitim glachet u mänggisch ou mitim grännet. Oder äs het villech äs bitzi dörfe d'Hang recke, dass dise het verstange, daser mit sim Plapper im Chopf gar nid so alleini isch.

Drum tueni hie jz lut dänke.

Du chasch drilose wo's di grad dünkt. Drususe näh was dir gfaut. U was nid passt, lo stoh wies grad isch.

Mis Gringli wott hie weder rächt ha, no wottes d'Wäut verändere.

Äs wott eifach nume lut dänke...

 

So wünschi dir jze viu Fröid bim zuelose u äs wüsse, dass nid alleini bisch, miteme sone redselige Gringli wie ig eis ha.